Laburpena: Felipe Erostarbek sortutako enpresa, Elgetako udalerrian 1933 baino lehen. Beste lan batzuk ere egin zituen, beti zuraren sektorean, baina gero altzarien fabrikazioa izan zuen jarduera nagusia. Marka komertzial gisa “El Modelo” izena hartu zuen. 1970 inguruan sozietate anonimo gisa eratu zen. 1974an, Zumaiako Oikia auzora eraman zuen, pabiloi berri batera, eta 1982an eten zuen jarduera.
Historia:
1933a baino lehen Felipe Erostarberen izenean sortutako enpresa da, Elgetan kokatua, arotzeria-industria gisa. 1936ko gerran jarduera eten ondoren, “mobilizatuta zeudelako”, 1940ko urtarrilaren 30ean berriro hastea eskatu zuten, Industria Ordezkaritzan, Erostarbe Anaien izenean.[1]
Erostarbe Olañeta, Jose Marïa, Felipe eta Juan anaiek eratu zuten Erostarbe Hermanos, S.R.C., kudeatzaile Juan izendatuz. 1970 inguruan, Erostarbe Hermanos S.A. bihurtu zen.
70eko hamarkadaren hasieran “Hamabi” proiektua sortu zen, Gipuzkoako hamabi altzari-fabrikatzailek sustatua, besteak beste, Erostarbe Hermanos enpresak, Zumaiako Oikia auzoan, beren produktuak banatzeko biltegi bat eraikitzeko. Baina proiektua ez zen gauzatu sustatzaileetako batzuk erretiratu zirelako, eta Muebles El Modelok bakarrik jarraitzea erabaki zuen, Muebles Xey enpresaren ondoko lurretan kokatutako pabiloi berri batean.[2]
1973ko “petrolio-krisiak” altzarien sektorean eragindako krisi gogorrak eta Oikiako lantegi berrian egindako inbertsioek, egoera jasanezin batera eraman zuten enpresa. Horrek, ordainketa-etendura eragin zuen 1981ean, eta behin betiko itxi zen lantegia 1982an.
1986ko urtarrilaren 9ko BOEn, Gipuzkoako Lan Magistraturaren ediktu batean, enpresaren eraikina enkantean saltzea iragarri zen. Saldu ez zenez, Zerga Administrazioko Estatu Agentziaren beste enkante iragarki bat argitaratu zen 1992ko apirilaren 24ko BOEn, baina oraingoan eraikina 29 lokal independentetan banatuta. Horrela egin zen eta gaur egun hainbat lantegi daude bertan.
Ezaugarriak eta produkzioa:
Lehenengo urteetan, enbalaje-kaxak egiten eta zura esterilizatzen eta lehortzen aritu ziren. Baina 1948rako altzariak egiten hasiak ziren, etxeko altzariak, jangeletarako eta logeletarako batez ere, eta izen komertzial gisa, aurrerantzean ezagunak egingo zituen “El Modelo” hartu zuten.[3]
Erostarbe Hermanos enpresaren altzariak taula inprimatuarekin eginak ziren, horrelako altzariak ekoizten zituzten bakarrenetakoak, bakarrak ez baziren ere. Hala eta guztiz, azken aldian altzari xaflatuak ere egin zituzten.
1974an, Oikian eraikitako planta berrira lekualdatzen hasi ziren, 324,40 metroko luzera, 30,40 metroko zabalera eta 9.861 m2-ko azalera duena, 26.862 m2-ko lursail baten gainean. Lehenik eta behin, produktu amaituen biltegia eta muntatu gabeko stock bat instalatu zituzten, kabina presurizatutako kabinako akabera eta enbalaje sekzioekin batera, ondoren taulak mekanizatzeko sekzioa gehitzeko.[4]
Erostarbe Hermanos beti nabarmendu zen izen handiko ekoizteko baliabideak izateagatik: Schwabedissen eskuairagailu bikoitz automatikoa, IMA ertzak xaflatzeko makina bikoitza, Nottmeyer zulagailu anizkoitza, Böttcher & Gessner eta Anthon banda zabaleko lixagailuak, Josting zizaila, Kuper xaflen juntagailua, Steinemann gainazalak inprimatzeko makina, Eisenmann ultra-morezko lehortegia. 70eko hamarkadaren amaieran profilatzeko eta xaflatzeko makina konbinatu bat erosi zuen, Egurko markakoa.[5]
1960an Elgetan 50 langile zituen, 1974an Zumaiara lekualdatzen hasi zenean 96 eta 1981ean 115 langile izatera iritsi zen.[6]
[1] EAE-HAAN Euskal Autonomia Erkidegoko Artxibo Herri Artxibo Nagusia.
[2] Luis Unanue Ispizuak emandako informazioa.
[3] EAE-HAAN Euskal Autonomia Erkidegoko Artxibo Herri Artxibo Nagusia.
[4] Ibidem.
[5] Ibidem.
[6] Ibidem.
